كل اللي قالوا

[Şα3Đ..♥]

كل اللي قالوا حبوك
بيجملوا ف السرد
في ناس بتزرع شوك
جوا جناين الورد
يرموا كتير من قول
ويزوروا في أصول
و إن قل المحصول
جابوا العيبه من الارض

ديما هتلقي كتير
من كل حاجه اتنين
وهتلاقي ف المشاوير
ديما معاك طريقين
شوف ده بيوصل فين
وده بيوصل فين
عد الخطاوي زين
وخد بالك من العد

ورا كل باب موجود
أسياد و برضو عبيد
تلقي قلوب مالسود
تلقي قلوب مالبيض
افرز وشوف أعوان
جدعان من الأحرار
ما تتوهش في الالوان
لا يخونك المشوار
بعض الصحاب جنه
والبعض أصبح نار
إستهدي و استني
و اختار صاحب هيسد

اختار و نقي شريك
لك مطلق الحرية
وأوعي الصحاب ال Fake
دول ف الطريق غِية
لو تلقي حد شاريك
تلقي اللي باع 100
صاحبك يساند فيك
وقت الهزار و الجد

#محمدسعد

[شاعر الحب الحزين]

اسمع كلامه ده بينصحك
ركز في كل كلمة وحرف
اعمل بيه صدقني هيريحك
هتقوله شكرا يا ابو سعد

من اجمل كتاباتك وفيها الكثير والكثير
سلمت والنبض والقلم المفعم بالإحساس
شكري وتقديري وامتناني ❤️

[ساحر الأحزان]

الله ينور ابوسعد

قلمك جميل

ومش كل الي يقول


نصدقه ونمشي معاه

فيه ولاد اصول


العيش والملح يتمر معاه

احسنت ابوسعد

تحياتي ووردي

[جنون قلب]

بعشق طريقه الكلام دي
بحسها اغنيه وبحس فيها ب لحن
وانا بقراها بحسني بغنيها

روعه هي كلماتك
دمت بالف خير

[L o o o l y]

جميل اوى واحساس عالى
يسلم نبضك

[yasmin dd]

كلماتك جميلة تسلم ايدك

[ياسمينااا]

أهم حاجه الإختيارات اللي بنختارها في حياتنا
احنا اللي بنقرر نمشي في أي إتجاه
وأحياناً بتبقي مرايه الحب عاميه وبنندم بعد كدا
كلمات جميله وإحساس ونصائح أروع
تسلم سعد

[حـيـــــآة ❤]

بقالي كتير محسيتش بالنغمه دي ف كتابات
تسلم ايدك

[العاشق الذى لم يتب]

منورسعد
واغنايك الجميلة
ومعانى اهل الريف الاصيلة
سلمت مبدعتنا
تحياتى

[Şα3Đ..♥]

متشكر جدا جدا لمروركم
وحقيقي انا لو بكتب فا بكتب علشان اشوف ارائكم واتبسط
برغم ان في ناس كتير مبقوش موجودين
بس وجود الخمسه ستة اللي بيدخلوا كل فتره
ومجرد لايك منهم حاجاتي بتزداد قيمة اوي والله

منورني ديما

تحياتي لحضراتكم