حائره..على جسر من الذهب

[دمعه حائره]

أخيرا ألبوم عمرو دياب الجديد نزل
معدى الناس
روعه بجد مش عارفه ابطل اسمعه
وشكلى مش هنام
اغنيه معدى الناس واغنيه اول كل حاجة بعيدهم كزا مره..
اصل عمرو دياب ده الهضبة تاريخ كبير محدش عرف يوصله

[دمعه حائره]

QUOTE=Muhammad_Adel;5152942]

مِنة الله الإنسانة الهادية الرزينة , صَاحبة الإحساس والكلمات الأجمل

عرفتك بــ ’’ شمس المنتدي ’’ ولا أُخفيكِ سِراً أنتِ كذلك

وكما قال صديقي الشاعر :-

وجودك يُزين المُنتدي بنجمة لو رآها العرب قديماً لتركوا الشِعْري وعبدوها ,

لو رصدها أهل الفلك لجعلوها بُرجاً للحياة
, لو عرفها سكان أثينا القُدامي لنَصَّبَوهَا إلها للمحبة

ولأني مش مقتنع بفكرة ( حساب صراحه ) أو مثيلاتها

حبيت أضع الكلام هنا لــ أُختي منة الله

, عندي أخت اسمها منة الله بالفعل هسميها شمس العيلة بعد كده ^^ .

[/QUOTE]


من مدونه محمد عادل
بصراحة كلامك فرحنى جدا وكتير عليا بجد
وشرف كبير ليا ان يكون رايك فيا كدة وبتابعنى
انا اتشرفت جدا بمعرفتك نعم الاخ الخلوق المحترم
تعاملك وردودك مع الجميع بكل احترام وزوق
ربنا يديم الاخوة الجميله ويارب يوفقك فى حياتك
هو انا اسمى منه بس مش منه الله لكن عرفتنى من شمس المنتدى
على فكرة مش انا اللى سميت نفسى شمس المنتدى
لحسن تفتكرونى مغرورة ولا حاجة هههه
ياريت تسلملى على اختك جدا ويارب تفرح بيها
وبشكر كل اللى بعتلى تقييم
ياسر وشاعر الاحساس وابو عصام
كلكم اخوة بعتز بيهم وجودكم مؤثر جدا فى المنتدى
ربنا يخليكم ويوفقكم ديما

[دمعه حائره]

النهاردة صحيت زهقانه وعندى احساس عاوزة اضرب حد
وبعدين قولت يابت ليه تضربيهم
لما ممكن تطبخى حاجة جديدة وتطفشيهم
شوفت وصفه فته سورى
اخواتنا السوريين دول دماغ وشاطرين فى الطبخ ماشاء الله
توكلت على الله ودخلت والله سهله
عيش محمص ورز بسمتى وفراخ قطع وتنزل بقى بالصوص
ده مختلف عننا احنا بنحط توم وصلصله
انما دى ذبادى وطحينه وتوم وتوابل على مزاجى بردو هههه
كمان مفروض لوز وصنوبر بس انتم مش فى سوريا هاا
المهم عجبتهم وكلولها بس قالوا متعملهاش تانى
ومحدش طفش هههههه
ادى صورتها

[دمعه حائره]

ناس كتير بتكلم على السند والصديق
ووقت الضيقه يدوروا على حد يقف جمبهم
لا على فكرة الدنيا مابقتش كده
ولازم تتعلم تسند نفسك وتساعدها
ولما تقع ماتدورش على ايد تشيلك
قوم لوحدك واستقوى بيك
الناس مابقتش تحب الضعيف ولا اللى مالوش فايدة
واهم حاجه بقى خليك سطحى فى كل معاملاتك
بلاش العمق اللى بيودى فى داهيه ده
شوية نصايح من حد فاقدها

[دمعه حائره]

ومش بإيديك ولا بإيديا
نعيش قصتنا من تانى
وأكيد عارف وحاسس بيا
فى غيابك قد إيه أنا بعانى
ولسه ليك جواياحنين يناديك
بيعزف غنوة ألحانها بفكر فيك
ويبعتلك سلام
من غير لا عتاب وملام
وعلى قلبى يوصيك
لأن مفيش غيرك سكن جواه
ولايوم قدر ينساك
عشان أنت اللى علمته الحب
وعرفنا معاك
إحساس إن قلب يدق
ودقاته تقول للناس
أعرفوا يعنى إيه إخلاص
وإزاى بكلمة حب
بنتعلم نسامح بعض
وننسى أى خصام وبُعد
وبكلمة شوق بتجمعنا
تنسينا كل أوجاعنا
ومهما الدنيا تفرقنا
بتفضل حاجة جوايا
تنادى عليك
بفكر فيك..
mena_hassan

[دمعه حائره]

وبخاف البعد يقسينى
وانساه وهو قصاد عينى

البعد ده كان غصب عنى

علشان ف القرب بيهملنى
واتكلم عمره مايسمعنى

فيها ايه لو يفهم ويقدر
أو يهدى شوية ويفكر

محتاجه لقلبه يكملنى
محتاجه لعقله يفهمنى

وإن خوفت أنا منه يطمنى

انا عاوزة حبيب مش بس كلام

عاوزاه لما اتعب يسندنى
عاوزاه مايهدش لأ.. يبنى

بغلط وأنا عارفه انى عنيدة
بس بحبه ده حاجة اكيدة

وإن يوم فكرت إنى اسيبه

برجع من تانى إكمنى..

ف بعاده النوم ده مخاصمنى
ده انا كنت بشوفه ف أحلامى
ماهو اللى محلى أيامى
وبيفرح قلبى ويسعدنى

ف بخاف البعد يقسينى

وانساه وهو قصاد عينى
mena_hassan

20-8-2017

[دمعه حائره]

مش معنى انى بخاف على زعلك يبقى تزودها وتدلع
وافتكر ان للصبر حدود
واتقى شر الحليم اذا غضب
اهو كلام بقوله لما يفيض بيا
لانى بصراحة مبقتش عجبانى
ولازم اعيد حساباتى من جديد فى طريقة حياتى

[دمعه حائره]

الموت بقى قريب اوى وواخد الشباب اكتر من الكبار
حال الدنيا غريب اللى زهق من حياته وعاوز يموت عايش ومكمل
وفى كل الاحوال محدش بيعمل لاخرته
ربنا يبعد عنا موت الغفله ويحسن ختامنا

[دمعه حائره]

بقالنا سنين بنشوف الحجاب انتشر ومن سن صغير
مش هاقول انى كنت منهم لا
انا اتحجب بعد مااجوزت بفترة
بس اللى ملاحظاه الايام دى انتشار ظاهرة خلع الحجاب
والغريب مش صغار السن بالعكس ناس بقالهم سنين بحجاب
معرفش هو صح ولا غلط ان البنت الصغيرة تتحجب بس عشان الكل كدة
افتكر لو اتحجبت عن اقتناع بتكون ثابته فى قرارها وحتى اللبس بيكون مناسب
ربنا يهدى ومايكونش اتجاه شعبى لغرض ما

[دمعه حائره]

‏يعلمنا التكبير ألا نحزن
كيف نشكو علة والله أكبر؟
الله أكبر عندها الأحزان في الأعماق تصغر
الله أكبر كل قلب بعد كسر سوف يُجبر