الوجع

[شاعر الحب الحزين]

في وجع بيخليك تتألم
في وجع بيخليك تتكلم
في وجع بيخليك تتعلم
بس أصعب وجع
اللي بيفضل ف القلب معلم
وجع يخليك جدع
مع كل أوجاع الحياة تتأقلم
في وجع يبعدك
يخليك لو شفت مين ما تسلم
في وجع يسعدك
لو شفت حبايب ف جراحك بتلملم
مفيش وجع ممكن قصاده تستسلم


في وجع منقدرش نقوله
وإن قلناه محدش بيصدقنا
مفيش وجع الأطبة وصفوله
قلب يحس بينا ويعشقنا
من الوجع نسهر نتألم الليل بطوله
ووجع القلب دايما سابقنا
نتمنى الشفا وفين وفين لما ننوله
زي ما نستنى حب حد مفارقنا
في القلب وجع فقد الطب كل حلوله
فضل الأمل في ربنا اللي خالقنا


الوجع كلمة هتشوفها صغيرة
بس هي أكبر من حروفها
سبقت الحب خلته يفضل ورى
فرضت نفسها بكل ظروفها
ياللي بتوجعوا قلوبنا هل يا ترى
بيحس قلبكم بالراحة ويشوفها
الوجع في حياتنا صفحات متكررة
والدوا صفحة وحدة ي كسوفها


ش . ح

[Lamees]

اللي بيظلم يا خالد ويجرح ويوجع
مش بيكون شايف ده
بالعكس بيعيش دور الضحية بالظبط
وتسمعه تحس أنه مجاني عليه
واننا احنا الظالمين
كل واحد بيشوف من منظوره الخاص

راقتني أوجاعك خالد
اسعدك الله

[ساحر الأحزان]

الوجع

كلمه صغيره ولكنها تحمل مفاهيم الحزن الكثيره

التعب الضيق الحزن

وما خفي كان اعظم داخلها

كلمات تحترم من صاحب قلم يحترم

تحياتي وتقديري لك خالد
صاحب القلم الجميل

[مهيب الركن .]

اى وجع لازم نتخطاه ومنقفش عنده
ده بداية العلاج
انما التفكير المتواصل فيه بيزيد تبعاته وبيطول اثاره

سلم قلمك الراقي اخى الفاضل

[حـيـــــآة ❤]

ربنا يبعد عنك اي وجع
تسلم ايدك

[fanaa]

لازم تتوجع عشان تتعلم دى قاعدة أساسية يافنان 🙄

[إيلاانا]

وهناك وجعًا يجعلك تصمت لا تستطيع البوح به
ببسطة مجرد الحديث عنه يقتل
سلمت على هذه الكلمات الجميلة
حفظك الله واسعدك
إيلانا

[*فجر الاسلام*]

ربنا يبعد عنك كل وجع ي خالد
الاوجاع بتعلم والمفروض تخلينا اقوي مش نعيش معاها ليل نهار
اللي فات مشي ولازم يمشي من الذاكره
تحياتي

[ahmed 22]

الوجع في حياتنا صفحات متكررة
والدوا صفحة وحدة ي كسوفها

ناايس
حلو القفلة والله


بس في الاول والاخر
الوجع دواء مر
الناس بتتوجع وتتألم عشان تنسي
والا هتموت من القهرة ..

ربنا يسعدك دايما
ويسعد الجميع يا رب

[شاعر الحب الحزين]

اقتباس المشاركة الأصلية كتبت بواسطة lamees اللي بيظلم يا خالد ويجرح ويوجع مش بيكون شايف ده بالعكس بيعيش دور الضحية بالظبط وتسمعه تحس أنه مجاني عليه واننا احنا الظالمين كل واحد بيشوف من منظوره الخاص راقتني أوجاعك خالد اسعدك الله

اه والله معاكي حق يا روني
والناس بتصدقه وتكدب المظلوم إلا القليل منهم

دائما حاضرة بصدق الكلمة والتفاعل
يروقني حضورك الأنيق وكلماتك الطيبة روني
أسعدتيني بحضورك الطيب المثمر
شكري وتقديري وامتناني 🌺